Reklama

To są basë, to są...

Kùlturowniô

09/02/2022 17:43

„Kaszëbsczé nótë” to wierã nôbarżi znónô piesniô-zabawa w rodny mòwie. Prostô melodiô a jesz barżi prosté słowa. W slédnym czasu pòchòdzenié „Nótów” badérowôł Rómk Drzéżdżón. Terô wzãlë sã za nie Òla a Dark Majkòwscë. To nié pierszi jich dokôz dlô dzecy, tec znómë jich na Kaszëbach òsoblëwie z „Werónczi”, jakô wëszła do grëpë, to je wszëtczé dzéle, w dwadzesce tësącach egzemplarów. Zdôwô mie sã, że „Ùcz sã jãzëka z kaszëbsczima nótama” téż stónie sã bestselerã. Nótë w jich szëkù to wcyg zabawa i spiéwanié, kò téż ùczba i to na rozmajité ôrtë. Do tegò piãkno òbònioné malënkama Paùlënë Nitë.

- Wedle mie, wcyg brëkùjemë ksążków i jinëch materiałów, dzãka jaczim dzecy i starszi bãdã mòglë pòznawac kaszëbsczi jãzëk i równoczasno bëlno sã bawic. Móm nôdzejã, że naja ksążka mdze tak wëzwëskiwónô przez szkólnëch, familie i wszëtczich, co chcą sã ùczëc kaszëbiznë. Pòmògą w tim na gwës pëszné malënczi, czekawé zadania i platka z nagrónyma spiéwama - gôdô Òla Majkòwskô.

Wëdôwcą je Kaszëbskò-Pòmòrsczé Zrzeszenié.

P.D.