Reklama

Òd krowë czë òd kropa?

Kùlturowniô

08/02/2022 12:23

30 lat temù na cerkwie sw. Jerzégò w Bëtowie miestny part Kaszëbskò-Pòmòrsczégò Zrzeszeniô pòwiesył tôflã na wdôr pastora Szëmóna Krofeja. Je to dobrô leżnosc, żebë przëbaczëc tegò Kaszëbã, ùtwórcã pierszégò pòmòrsczégò lëteracczégò jãzëka. Òsoblëwie temù, że tak richtich nie znómë, czej sã ùrodzył a téż czej ùmarł. Wedle tegò w tim rokù bãdzemë mielë starã napisac pôrã krofejowëch tekstów. Z pierwsza ò nôzwëskù Krofej.

Pierszi rôz pòjawiło sã w 1560 r. Na Kaszëbach leno na Bëtowsczi Zemie, òstatny téż tam na zôczątkù XVIII w. Nôbarżi pòpùlarnô etimòlogiô spòdlé tegò nôzwëska widzy w słowiańsczim słowie krowa, abò jak chce prof. Zygmùnt Szultka w dólnosasczim Kroff, co mô znaczëc stôrą krowã. Krofej (Krofei, Krafey, Craffey, Kroway) miôłbë bëc zniemczałim szëkã òd łacëznowégò Krofeius. Drëgô etimòlogiô parłãczi nôzwëskò pastora ze strzédnowësokniemiecczim słowã kropf abò kroph. Òznôczô òno nisczégò człowieka abò człowieka z kropã (notabene kaszëbsczi krop pòchòdzy z niemiecczégò). Wiémë, że ju w XV w. òd słowa kropf/kroph ùsôdzelë przezwëstka, np. w Krakòwie mieszkôł jeden Krofus. Òd jaczégò słowa pòchòdzy pòmòrsczi Krofej? Przódk Szëmóna trzimôł wiele krów czë mòże na szëjë miôł krop abò béł nisczi?