Reklama

Pòsobny numr lëteracczégò cządnika „Stegna”

Kùlturowniô

05/03/2022 20:27

Ju wnetka wińdze pòsobny numr lëteracczégò cządnika „Stegna”. Nalézemë w nim m.jin. czile dokazów dlô dzôtk. Jak pisze redaktór pismiona Dark Majkòwsczi: „W slédnym czasu wëszło smarą dosc tëli kaszëbsczich ksążków dlô dzecy, w tim tłómaczenia wôrtnëch dokazów swiatowi lëteraturë, jak chòcle Brawãdë bracy Grimm. Chcemë w ti „Stegnie” dodac jesz cos do tegò corôz bòkadniészégò zbioru ùsôdzków dlô dzôtk. Bédëjemë najim Czëtińcóm m.jin. pòwiôstkã Karolënë Serkòwsczi-Secechòwsczi i pôrã òpòwiôdaniów Justinë Pranszke. Są téż krótëchné tekstë młodëch ùczãstników kònkùrsu Bë nie zabëc mòwë starków, chtërny dopiérze zaczinają przigòdã z pisanim, ale ju próbùją pò kaszëbskù. Mòże czedës naja lëteratura mdze miała z nich wiele dobrégò? Wôrt téż dac bôczenié na czile jesz niepùblikòwónëch wiérztów Alojza Nagla.

Je wiedzec, że w „Stegnie” są téż bédënczi dlô dozdrzeniałégò czëtińca. Tradicyjno nalézeta tu wiele kaszëbsczi pòezje i prozë, wspòmink ò zabëtim ùtwórcë Janie Labùdze, zôchãtã do czëtaniô debiutancczi ksążczi Matéùsza Bùllmanna i wiele jinëch czekawëch dokazów i artiklów.

Red.