Eroticzi niewërzekłé do kùńca

Ana Różk donëchczôs pùblikòwała przede wszëtczim w „Zymkù”, ale chcemë rzeknąc, że le czile ji ùsôdzków wëszło donëchczôs smarą, chòc napisała jich ju dosc tëli (zaczãła twòrzëc pò kaszëbskù – jak sama pòdczorchiwô – òbczas ùczbë w Kaszëbsczim Òglowòsztôłcącym Liceùm w Brusach).

Ju òd jaczégòs czasu dochôdałë do naji redakcje wiadła, że wcyg pisze òna wiérztë „do szëflôdë”. Na szczescé ju wnetka ùkôże sã ji pierszi zbiór pòezji. Bãdze to 21 erotików – taczich białczënëch, z wielnyma niedopòwiedzeniama, dze baro wiele dzeje sã we wëòbraznie i zanôlégô òd tegò, chto i jak czëtô ne tekstë.

Jak napisôł we wstãpie do ti ksążczi Dark Majkòwsczi: „Pòetka rozmëslno òstôwiô wnet wszëtkò niewërzekłé do kùńca, òstawioné w półcéni, westrzód słodkòszeptów, słodkòłgarstwa i cëchòspiéwów. To, co nie je tu nazwóné, mùszimë so dopòwiedzec sami w swòji zòbrazënie, wëzwëskac swòje miłotné doswiôdczenia i fantazje. Niejedny zatrzimają sã pòd dwiérzama lubkòscë, a jiny pùdą krok dali (abò i trzë). Kòżdi sóm mòże téż zdecydowac, w jaczé dzélëczi białgłowsczégò cała mdze wanożëła kropla wòdë prowadzonô zdebłã trôwë.

(…) W nëch wiérztach mómë jakąs jigrã z czëtińcã, chtëren òd rozskaceniô i pòżądlëwòtë je tej-sej w jednym wersu sprowadzony do ùsmiéwkù, zadzëwòwaniô i zascygnieniô.

Liriczny subiekt mërgô do naju òkã i rôczi do zabawë w niewërzekłé do kùńca. Żelë chto sã dô wcygnąc w tã jigrã, pòczëje wiele redotë z czëtaniô negò zbiérkù. A jak so dô czas na przedstôwienié tegò, ò czim czëtô, i pòmësli, jak sóm bë skùńcził te historie, to òkróm ùsmiéwkù pòjawi sã téż pòdskacenié, a gra zmieni sã w grajnosc”.

Ksążkã „Szmeroszeptë” wëdô Mùzeùm Kaszëbskò-Pòmòrsczi Pismieniznë i Mùzyczi we Wejrowie. Snôżą ji wëòzdobą są malënczi Julie Sobierajsczi.

Nigle ùkôże sã całô ksążka, naji czëtińcowie mògą przeczëtac pôrã ùsôdzków Anë Różk…

Rozegracëjô dlô dorosłëch

Pòsmùkniãcé lëpów
Pòsmùkniãcé pôlców
      Zatańcowôł
      Zadërgòtôł
      Znierëchòmiôł
Zapłonãła płomieniã
Rozpôlëła sã ògniã
Czipiąc, falëjąc, chcąc....
      pòd òkrëcym nocë.
 

Zdebło

Zdebłã trôwë
zelonym
swiéżim
krzesznym
prowadzysz
kroplã
rosë
pò mòjim cele
ùsmiéwk
dërgòt
robisz
kòła
kółka
kółeczka
mòkrô
kropla
rosë
zdebłã
prowadzonô
staje
na napiãti
z łakòtë
wëżawie
zdebło
òdlatiwô
Twòja
rãka
dali prowadzy
kroplã