Reklama

W roczëznowim 2022

Kùlturowniô

01/01/2022 17:21

Mómë nowi rok. Co rëchtëją na 2022 kaszëbszczé wëdôwiznë? Z piersza zazérómë do „Regionu”. - W przińdnym rokù wëdómë „Ò panu Czôrlińsczim, co do Pùcka pò sécë jachôł” Hieronima Derdowsczégò. Naje wëdanié ùsadzymë w dzysdniowim pisënkù, kò w pierwòsznym szëkù, to je wedle pôłniowòkaszëbsczégò mòdła - gôdô szef wëdôwiznë Jark Élwart. „Region” ju rëchtëje téż dëbeltną „Historiã Kaszëbów” Aleksandra Majkòwsczégò a Friedricha Lorentza, òbie z dzysdniowima kòmentarama. - Do tegò wszëtkò to, co Józwa Łãgòwsczi napisôł ò Kaszëbach, Kòcewim a Pòwislim - dodôwô szef „Regionu”. W planach są téż dwie pierszé pòwiescë Jana Piepczi - „Purtkowe stegny” i „Hanesk” a téż zbiér liricznëch dokazów Benedikta Karczewsczégò. Òkróm tegò jak wiedno „Region” bãdze wëdôwôł turisticzné prowadniczi i legeńdë dlô młodszich czëtińców.

Dlô wëdôwiznë rok 2022 mdze wôżny z leżnoscë òkrãgłi roczëznë - 30 lat dzejaniô. Kò to téma na pòstãpné wiadło.

Red.