Reklama

Przëbôcziwanié a pòzowanié

Kùlturowniô

29/12/2022 21:15

Kalãdôrze gminë Tëchómié w bëtowsczim krézu Gminny Òstrzódk Kùlturë rëchtëje ju òd 23 lat. Ùdba je takô, żebë lëdze mòglë na nim òbaczëc sebie. Latos miało bëc jistno. Ludwik Szréder, direktór GÒK-ù, ùmëslił przëbaczëc, nié tak przecã dôwné, żëcé we wsë. Tej w kalãdôrzu pòjawiłë sã òdjimczi, na jaczich widzec żniwa, a przë tim klepanié kòsë, wëkòpczi, draszowanié, darcé pierza a jinszé. Wszëtkò òdtwòrziwelë lëdze z szôłtësczich wsów w gminie Tëchómié. Do grëpë czileset sztëk. Chùtkò sã równak òkôzało, że to nie mdze leno prosté pòkôzanié, jak to pierwi bëło. Dlô mieszkańców wëszukanié pasownëch ruchnów (tec je wiedzec, że niżódne mòderné nie pasëją) abò stôrëch sprzãtów (gdze chùtkò nalezc maszinã do wëbiéraniô bùlew na kònia i to jesz, żebë bëła sprawnô?) stało sã wiôldżim przeżëcym, elementã integracje, a przede wszëtczim leżnotą, żebë kąsk młodim òpòwiedzec, jak to dôwni sã we wsë żëło. Tej òkróm kalãdôrza pòwstôł jesz film z kùlisama pòwstôwaniô òdjimków do niegò. W naddôwkù mòżna na nim ùczëc òpòwiôdanié starszich: Do zôpùstów pióra mùszałë bëc òskùbóné. Tej sã białczi zbiérałë, czasã przëszlë sąsedzë. Bëłë spiéwoné piesnie i bòżé, i kòzé. Ò lëdzach kąsk pògôdóné, a czasã i òbgôdóné. Wszëtczi swòjã dolã dostalë - gôdô na filmie mieszkanka Cemna.

Kalãdôrz pòmalinkù trôfiô do mieszkańców gminë Tëchómié, a filmik z jegò pòwstôwaniô mòżeta òbaczëc TUWÒ.

Red.