Reklama

Kôlbùs nôbarżi szmakô dopiérze pò pasterce

Kùlturowniô

24/12/2022 15:20

Rëchtowanié kôlbùsów (gdze jindze na Kaszëbach kôłbasa abò wòrzta), në, nié taczich zwëczajnëch, kò òsoblëwie na Gòdë to stôri zwëk w Jastarnie na Élsczim Półòstrowie. Tradicjô je nômni 150 lat stôrô. Pierwi wnet w kòżdim dodomie trzimelë swinkã, jaką na przełómanim lëstopadnika a gòdnika szlachtowelë. Miãso kùrzëlë, solëlë, a prawie z nôlëchszich sztëczków rëchtowelë kôlbùsë. Tec nic ni mògło sã tranowic. Z czasã szëk robieniô sã zmienił, lëdze zaczãlë ùżëwac corôz lepszégò miãsa jak np. karkòwinë.

Kò sóm zwëk, tj. rëchtowanié kôlbùsów kòle 10 gòdnika, òstôł. Ti wòrztë nie jé sã jaż do Gòdów. Tec czej sã żdaje, tej lepi szmakaje! Prôwdac niejedny czekają leno do pasterczi, czej ta sã skùńczi, a tej sã spòtikają ù kògò doma, gdze kôlbùsa pòdôwają na stół.

R.S.