Reklama

Méster tradicje - rogarsczé warkòwnie

Kùlturowniô

24/01/2023 16:20

Chòc Kaszëbi baro rôd zażiwają tobaczi, równak czasã mają kłopòt, skądkaż różk do tobaczi wzyc, kò prôwdzëwi tobacznik le z krowégò roga bë miôł zażëwac, a rogòwników mało. Temù téż Kaszëbskò-Pòmòrsczé Zrzeszenié ùmëslëło so zrëchtowac rogarsczé warkòwnie w òbrëmienim cyklu Méster tradicje.

W czerwińcu 2022 rokù adepcë rogarsczégò kùńsztë pòtkalë so pierszi rôz w Osadzie Łowców Fok w Rzucewie, bë tã pòd òkã Jana Drzéżdżóna a jegò sëna Rómana, naùczëc so, jak a z czegò zrobic bëlny różk. Chòc robòta w rogù nie je przëjemnô (kòl òbróbczi brzëdkô wòniô), równak nicht z 13 chãtnëch (9 chłopów a 4 białczi) nie zrezygnowôł!

Brzadã nëch warkòwniów, co warałë dwa razë w miesącu òd czerwińca do gòdnika, bëłë nié le tobaczné różczi, ale téż rozmajité òbzdobë z rogù, chòcbë órińdżi a piestrzenie. Kò òkôzało sã, że wëòbrazniã a artisticzny trim, mają naju ùczãstnicë stolëmné!

Temù téż 21 stëcznika, na zakùńczenié warkòwniów, nowi rogòwnicë dostalë certifikatë - i chòc kùrsu je kùńc, to równak mdzemë mòglë sã z niejednyma z nich pòtkac na rozmajitëch jarmôrkach.

Dëtczi na rogarsczé warkòwnie dało Minysterstwò Kùlturë a Nôrodny Spôdkòwiznë z Fùńduszu Promòcje Kùlturë.