Lëpińce. Wëstãpë gadëszów

W sobòtã 26 strëmiannika w Zespòle Szkòłów w Lëpińcach òdbéł sã V Kònkùrs Gadëszów miona Józwë Brusczégò. Kòmisjô òbsãdzëcelów (Jiréna Lew-Czedrowskô, Katarzëna  Bruskô, Ana Narloch) przëznała nôdgrodë w trzech kategóriach. Westrzód nôlepszëch nalôzł sã  Szëmón Szajner, chtëren rzekł aùtorską gôdkã swòji sostrë, jakô dobëła w kònkùrsu w ùszłim rokù. Niżij nôdgrodzonô gôdka Szajnerów.
Red.

 „Nôlepszé biôłtkò na Kaszëbach”

W ùszłim rokù mòja sosterka przërëchtowa gôdkã w tim kònkùrsu, le to bëło bez internet. Równak, wedle mie, prôwdzëwi plesta mùszi gadac do prôwdzëwëch lëdzy, ò tak, jak më jesmë tuwò dzysô. Dlôte jô Wama rzekã to, co mia napisóné mòja sosterka- leno zdebło lepi. Tej słechôjta.

Jô Wama rzeknã czile słów ò moim starkù. To je richtich prôwdzëwi méster jinternetowi zachãcbë, chòc òn ò tim sóm nie wiedzôł – do czasu.

Ta całô pandemiô zbùdzëła w ópie wiôldżégò dëcha do geszëftu. Jesz w ùszłim rokù stark zwëczajno w sobòtã jachôł na rënk do Tëchómia, przedôwôł jôjka òd swòjich szczestlewëch, wiejsczich kùr i miôł z tegò dëtczi dlô se. Wôrt pòdsztrichnąc, że do niegò wiedno stojała nôwiãkszô réga białków na całim rënkù. Co sã dzewòwac – jô móm to za nim.

Pò prôwdze, stark mô szëk do hańdlowaniô, a do te je baro òbszczãdny. Z jedny taszczi arbatë òn parzi szterë, a na kùńc jesz wesëszi tã slédną na witro.

Czej i do naji wsë przëcygło to całi pòszëdło, stark mùszôł so radzëc jinaczi. Òn pòszedł jak më wszëtcë – w internetë!

Założił facebookòwą starnã, zrobił so fejn òdjimk z kùrama i zaczął swòjã zachãcbã. Wëmëslôł téż zéwiszcze. Wszãdzë òn miół czëté, że módnô je terô białkòwô dieta, tej òn so ùdbôł, że mdze sprzedôwôł nôlepszé biôłtkò na Kaszëbach, a żôłtkò w jôjkù bãdze darmò.

Czej to wszëtkò poszło w swiat, ju pòstãpnégò dnia przejecha pierszô białka w dzywny larwie na gãbie. Stark ji zarô wëbrôł tëch cëdownëch jôjków z nôlepszim biôłtkã na Kaszëbach, le cos sã ti białce nie widzało. Jedno jôjkò bëło përznã ùczapóné.

W kùńcu białka sã òdezwa:

- Wasta widzy, że to jôjkò je całi òd…, në òd…

- Në, òd czegò? – pitô sã stark.

- Në, òd tegò, òd… - skrziwiła sã białka.

 -Në òd… kùrë! – dokùńcził stark i głosno sã z ni wëszczerzôł.

-Przecã to je prôwdzëwé wiejsczi jôjkò! Wastna nigdë nie mia widzóné jôjków òd kùrë?! Në, widzec ni mia…

Pòstãpnégò dnia starkòwô zachãcba sygła jesz dali. Pò nôlepszi biôłtkò na Kaszëbach przejachało szterzech chłopów w czôrnym BMW. Wiéta, taczi chłopë, co to na frisztëk jedzą prażnicã z dwanôsce jôjków nômni.

Jima pò prôwdze szło leno ò to biôłtkò, bò chùtkò mùszelë so zrobic mùskle. Czej òni ùzdrzelë,że stark nijak ni mô taczégò towôru, tej òni so leno spitalë chòc ò jaczés mòcny zëleskò.

ÒÒÒ, co jak co, le diôbëlsczé zëleskò to stark miôł nôlepszé w òkòlim. Dôł chłopóm z BMW na spróbòwanié swòji nôlepszi a nômòcnieszi tobaczi i czej òni ji zażëlë, tej leno czichnãlë i zarô jich nie bëło, òstôł leno pich pò tim czôrnym BMW. Widzec, taczégò zëleska òni sã nie spòdzëlë!

Na drëdżi dzyń przejachôł szandara i pòwiedzôł ópie, że ju w całi gminie je wiedzec, że òn hańdlëje biôłtkama i zëleskã i zarô tu mdzemë mielë na łbie jaczé szpec kòmando z ABW. I tak stark mùszôł zamknąc swój jinternetowé geszëft, chòc wedle mie, to bëło prôwdzëwé mésterstwò, a pò jôjka dali przëjeżdżają do starka lëdze z całégò bëtowsczégò krézu, doch òn mô nôlepszé biôłtkò na Kaszëbach, a żôłtkò z jôjka dôwô gratis!

Wiktoria Szajner/Szymon Szajner