Reklama

Takò rzecze sztëcznô inteligencjô

Kùlturowniô

13/02/2023 20:20

Co je stolëcą Kaszëb? Bez lata spiér nie dôwôł rozrzeszeniô. Kùńczëło sã na szkalowanim, chlastanim pò pëskach, internetowim hejce. W slédnym czasu w zdrëszonym z „Kùlturownią” Labòratorium Rozmajitosców, co mô plac we Wiôldżim Kackù, chcelë jesmë do tegò spiéru wprowadzëc òbiektiwnotã, bez emòcjów a agresje. Leno rozëm, nôùka. Wëszło na sztëczną inteligencjã, to je SI. Je òna do wëzwëskaniô na internetowi starnie OpenAl. I prawie tam naje labòratorium spitało SI ò stolëcã Kaszëb. SI òdpòwiedza: Wejrowò. Niejedny rzeką: ni ma jak SI, nôùka to nôùka! Jiny (wierã wiãkszi dzél) że: z kómpùtra w labòratorium cos nie sztëmùje abò że SI trzimô swòje serwerë we Wejrowie, abò razno, że SI je głupô.

Temù dlô pòcwierdzeniô na drëdżi dzéń labòratorium jesz rôz spitało SI na OpenAl ò kaszëbską stolëcã. SI napisa: Bëtowò. Dali më nie pitelë, doch bëło klôr, że SI nie je równak głupô, ani że nie trzimô serwerów we Wejrowie, i że z kómpùtrã w najim labòratorium wszëtkò graje. W naddôwkù SI rozmieje dac lëdzóm to, co nôwôżniészé - redotã. Nôlégô le pëtac a pëtac, jaż òdpòwié prawie jak nama pasëje...

Red.