Reklama

Noc Mùzeów na Kaszëbach

Kùlturowniô

13/05/2022 17:44

Na Noc Mùzeów rôczą do se 14 maja mùzealnicë zachãcywając czekawima ùdbama. I tak na przëmiar...

W Kaszëbsczim Etnograficznym Parkù we Wdzydzach òd gòdz. ósmi wieczór do dwanôsti w nocë bãdze mòżna m.jin. zazdrzec do karczmë z gróną na żëwò mùzyką, pòdezdrzec robòtã szewca, szkólnégò a kòłodzeja.

Historiczno-Etnograficzné Mùzeùm w Chònicach zachãcywô do òbezdrzeniô przede wszëtczim dwùch nowëch wëstawów. W Człëchòwsczi Brómie pòkôzóné sã wëpòżëczoné z Gduńska, Warszawë, Pòznania a Torunia rozmajité lëdowé jinstrumeńta nié leno z Kaszëb, ale i jinszich regionów Pòlsczi.

W Baszce Kùrza Stopa òbaczëc mdze mòżna m.jin. wëstôwk z leżnotë 100-lecégò dzejaniô Chònicczégò Żeglarsczégò Karna, jaczi je nôstarszim w Pòlsce. Sobòtné zwiedzanié zacznie sã òd gòdz. szósti wieczór i warô do dwanôsti w nocë. W Zôpadnokaszëbsczim Mùzeùm w Bëtowie stôwiają na filmë. Pierszi z nich òpòwiôdô ò Józwie Chełmòwsczim a nakrącył gò Andrzéj Dudzyńsczi. Drëdżi to mùltimedialnô prezentacjô tikającô 100-lecégò pòwstaniô Związkù Pòlôchów w Niemcach. Mdze téż leżnosc do weńdzeniô na òstatno òdemkłi kùrtinowi mùr bëtowsczégò zómkù. Nocné òdwiedzënë zaczną sã ò gòdz. sódmi wieczór i mdą warac do jednôsti w nocë.

W nëch samëch gòdzënach bãdze zwiedzanié w Mùzeùm Kaszëbskò-Pòmòrsczi Pismieniznë i Mùzyczi we Wejrowie. Òrganizatorowie zachãcywają do przińscô w mùndurze (leno nié taczim, co sã mòże skòjarzëc z totalitarnym systemã). Szpecjalną niespòdzajnotã mdą miałë białczi z Kòła Wiesczich Gòspòdëniów z Bólszewa. Jakô? To w sobòtã. Wôrt le rzeknąc, że mdze smaczno i téż w mùndurze.

W drobnotach ò Nocë Mùzeów na starnach nié leno wëmienionëch mùzeów.

Red.