Reklama

Niech młodi pòkòchają kaszëbsczi jãzëk

Kùlturowniô

26/11/2021 20:27

Òd czile tidzeniów mòżemë òbzerac w internece filmiczi i òdjiczi robioné przez kaszëbską influenserkã, Karolënã Stankòwską. W gòdnikòwi „Pòmeranii” bãdze z nią dłëgszô kôrbiónka, a czëtińcóm Kùlturownie bédëjemë ji krótczi dzél.

Jak të bë wëtłómacza tim czëtińcóm, co nie sedzą za baro „w internetach”, kògùm je influencerka?

Karolëna Stankòwskô: To je baro drãdżé pitanié. To taczi człowiek, co żëje za dëtczi z reklam. Nick całi dzéń nie robi, leżi we wërach, nagriwô reklamë, żëje żëcym dlô gwiôzd.

Taczi kaszëbsczi celebrita?

Jo. To je terô baro módné. Młodi lëdze to òbzérają. Mòże to sã zdawac përznã smiészné, ale jô sã dobrze czëjã w ti rolë.

Nagriwôsz swòje filmiczi jakno kaszëbskô influencerka dlô szpòrtu czë môsz jaczé pòwôżné planë z tim sparłãczoné?

Nibë dlô szpòrtu, ale téż dlôte, żebë młodi lëdze pòkòchelë kaszëbsczi jãzëk, żebë wiedzelë, że kaszëbizna wcyg żëje i je piãknô. Në i żebë młodi zaczãlë gadac pò kaszëbskù. I ò to tak pò prôwdze w tim jidze.

Pòd twòjima filmama i òdjimkama je wiele pòzytiwnëch kòmentarzów, dzél z nich je pisóny pò kaszëbskù.

Jo. Są na przikłôd głosë zeza grańcë – lëdze piszą, że òd dôwna nie czëlë kaszëbsczi gôdczi, bò wëjachelë jakno dzecë, a terô mògą ji pòsłëchac i są baro rôd. Wiele je szpòrtownëch kòmentarzów. Ale piszą téż do mie mëmczi, jaczé pò òbezdrzenim mòjich filmów zaczãłë gadac w familiach pò kaszëbskù. To je dlô mie baro wôżné.