Reklama

Smùtanową pòrą

Kùlturowniô

23/11/2021 17:40

Pùstô Noc pòmalë òdchôdô w zabëté. Kò zabëtô wierã nie òstónie. Na Kaszëbach wiele ò ni pisôł ks. prof. Jón Perszón. Wcyg téż żëją méstrowie tegò zwëkù, co rozmieją spiewac stôré mòdlëtwë. Pôrã lat dowsladë ks. J. Perszón razã z dr. Sławòmirã Bronkã pòzebrelë 90 piesniów, jaczé òstałë wëdóné w zbiérkù bez Kaszëbskò-Pòmòrsczé Zrzeszenié. Dożdelë më téż platczi z 20 mòdlëtwama Kameralnégò Chùru Discantus z Gòwidlëna. W 2018 r. pierszi rôz pùstonocny piesniôrze z Zemi Bëtowsczi zeszlë sã w Płótowie (w òddzélu Zôpadnokaszëbsczégò Mùzeùm) a ùczëlë młodszich swòjégò kùńsztu. Na latosé zéńdzenié dojachałë téż białczi jaż z Roztocza w Lubelsczim. To nôleżniczczi karna „Jarzëbina” (prawie tegò, co zrobiło w Pòlsce trzôsk swòjim „Koko koko euro spoko” w 2012 r.). Białczi rozmieją piãkno spiewac pùstonocné piesnie ze swòjich strón, gdze niejedne szlachùją za naszima kaszëbsczima. Na drëdżi dzéń, tj. 21.11., nôleżniczczi „Jarzëbinë” i naszi spiéwôcë delë kòncert w kòscele w Tëchómiu.

P.D.