Reklama

65 lat dowsladë

Kùlturowniô

05/11/2021 15:41

To bëłë ale lata... Prôwdac PRL, kò tak wiele lëdzy, co wësziwelë tulpë, lelije, mòdrôczi i jesz co tam, nigdë na Kaszëbach më ni mielë. Pewno tak wiele temù, że prawie PRL, co miôł doch cësk na lëdowòsc, wedle swòji jideòlogie... Jak bë nie bëło, Cepelia dôwała robòtã lëdzóm rozdrzuconym òd Bôłtu do Chònic i òd Gduńska do Bëtowa. Za jigłë brelë sã prôwdzëwi méstrowie i ti nié do kùńca. Setczi, tësące, òsoblëwie białczi. Jich dokazë bëłë rozmajité, wiele razy dobiwa kòmercjô. Jo, tec pòwszechnota tegò zajãcô sprawiła, że wësziwk stôł sã tedë jednym z nômòcniészich symbòlów kaszëbsczi plasticzny kùlturë. Na całëch Kaszëbach rëchtowelë téż specjalné warkòwnie, żebë zwiãkszëc lëczbã lëdzy, co rozmieją wëszëwac.

W tim tidzeniu do naji redakcje zazdrzôł Lutk Szréder. Òd pôrãnôsce lat sznëkrëje pò gminie Tëchómie za stôrima òdjimkama. Nym razã przëniósł nama całą seriã prawie z kùrsu dlô wësziwôrków. W 1956 r. w Tëchómiu prowadzëłë gò Mariô Dobke (tëchómskô bibliotekarka) i Anastazjô Bòrzëszkòwskô (szkólnô z Piôszna). Hewò widzyta dwa z nich.

Red.