Reklama

Òdkriwanié Zbrzëcë

Kùlturowniô

21/11/2021 14:09

Gôdelë a piselë ò nim rozmajice. Pewno temù, że jegò pòeticczé dokazë czëtô sã drãgò. Kòl ti lekturë nôlégô bëc ùważnym, òtemkłim na jãzëkòwé wëstwôrzanié, na intelektualną rézã, do jaczi pòtrzébnô je szerszô wiédzô, nôlepi hùmanisticznô. Na kùńc równak szmaka długò òstaje na pòdniebienim. 18.11. Bòżena Ùgòwskô òbronia, z wëróżnienim, dochtorsczi dokôz ò ùtwórstwie Stanisława Pestczi (pseùd. Jan Zbrzyca).

Prôwdac ju przed tim jem zna wastã Stanisława, tec to bëła baro znónô pòstacjô kaszëbsczi kùlturë. Leżnosc blëżi pòznac miała jem òbczas redakcje jegò esejo-repòrtażu „W stolëcë chmùrników”, jaczi wëdelë w 2011 r. To bëła prôwdzëwô intelektualnô przigòda - spòtëkac, òbjasniwac, wëjasniac słowa, całé zdania… A jesz przepisëwac na kómpùtr, bò wasta Stanisłôw wszëtkò pisôł rãczno. W swòjim ùtwórstwie miôł starã szerok wëzwëskiwac pôłniową kaszëbiznã, mòckò wcëskôł jã do lëteracczégò jãzëka - gôdô B. Ùgòwskô. Promòtorã dochtoratu bëła prof. Adela Kùjik-Kalinowskô z Pòmòrsczi Akademie w Słëpskù. Jesz nie je wiedzec, czë dokôz wińdze jakno ksążka. Dobrze, żebë tak sã stało, bò chòc ò S. Pestce je dosc tëli napisóné, kò równak nigdë tak wiele i ze stronë pòetczi, jaką je B. Ùgòwskô.

P.D.