Reklama

Jednota òbczas chërë

Kùlturowniô

19/03/2022 21:10

Strëmiannik 2020 r., krótkò przed Dniã Jednotë Kaszëbów. To czas, czedë w Pòlsce, ale nié leno tu, ò pòszëdle robiło sã corôzka głosni. W Kaszëbsczim Mùzeùm w Kartuzach ùdbelë so ùdokùmentowac nen czas. Tak pòwstało archiwùm „Jednota w chërze”, jaczé dzys w Dzéń Jednotë Kaszëbów òficjalno zaprezentowelë. Nalazłë sã w nim przede wszëtczim nagrania òpisëjącé doswiôdczenié lëdzy òbczas pandemie. - Më chcelë pòkazac łączbã Kaszëbów nié leno w Dzéń Jednotë, ale téż w drãdżim czasu, w jaczim przëszło nama żëc - gôdô Barbara Kąkòl, direchtorka kartësczégò mùzeùm.

Nagrania sã przechòwiwóné w Kaszëbsczim Mùzeùm w Kartuzach. Pòsłëchac jich mòżna téż na internetowi starnie. W wikszim dzélu to wspòminczi lëdzy z kartësczégò pòwiatu, ale czile je z wejrowsczégò czë gduńsczégò. - Mëslã, że za jaczis czas mdze to zdrzódło wiédzë ò pandemicznym czasu - gôdô Barbara Kąkòl.

Dzys nagrań je 20, ale w przińdnoce mô bëc jich wicy. - Jeżlë chtos chcôłbë òpòwiedzec ò swòjim doswiôdczeniu, np. jak czuł sã w czas kwarantannë, jak przëżił chërã, mòże sóm je nagrac i przesłac do nas na adres [email protected] - dodôwô direchtorka.

Red.