Reklama

Zuza nôlepszą maturańtką

Kùlturowniô

23/11/2022 17:24

Òb czas latoségò Kaszëbsczégò Diktanda, jaczé òdbëło sã 19 lëstopadnika w Miastkù, wëprzédniony òstelë nôlepszi maturańtowie z kaszëbsczégò. W nym rokù nôlepi zdała Zuza Glëszczińskô, chtërna wiele razy startowała i dobiwała w rozmajitëch kònkùrsach, m.jin. „Twòrzimë w rodny mòwie”, gdze trzë razë zajãła I plac za swòje òpòwiôdania. - Jãzëk znajã z dodomù. W spòdleczny szkòle, a téż w gimnazjum chòdzëłam na ùczbë z kaszëbsczégò. W strzédny naprocëm stanãłë pózné gòdzënë i jiwer z dojazdã - gôdô Z. Glëszczińskô. Maturã napisała kąsk dlô se, żebë sã sprawdzëc. - Chcã téż ùdowòdnic jinszim, że nawetka czej sã w szkòle na kaszëbsczi nie chòdzy, mòżna do ni przëstąpic. Mùszi sã równak do tegò przëłożëc, a robòta przë tim nie je letkô - rzekła Z. Glëszczińskô. Internetowò łączëła sã z Matisã Klebbą i razã, w môłim karnie jinszich szkòłowników, cwiczëlë do maturë.

Z. Glëszczińskô òd rujana je sztudérką ekòenergeticzi na Przërodniczim Ùniwersytece w Pòznaniu.

Red.