Reklama

Pòstãpny dłótownik z Zôbòrów

Kùlturowniô

22/11/2022 08:35

W pòwiôstce ò tim, co Pón Bóg dôł ze swòji skrzëni, czej ùsôdzôł swiat, nié ò wszëtczim je rzekłé. Na gwës zafelało ò parmieniowanim, jaczé cësnął w stronã Brus. To parmieniowanié cygnie nadzwëczajną lëczbã artisticznëch taleńtów. Òsoblëwie òd kùńsztu dłótowaniô. Wëstôwã jednégò z tegò karna, Jerzégò Dorawë, mielë òtemkłą w przeszłim tidzeniu w Zôpadnokaszëbsczim Mùzeùm w Bëtowie. Prôwdac artista ùrodzył sã w Człëchòwie, tec òd dzecnëch lat mieszkô pòd Brusama. To tam w spòdleczny szkòle ùcził gò Włodzmiérz Òstoja-Lnisczi, chtëren miôł wiôldżi cësk na młodégò wrazlëwégò knôpa. Kò młodi Dorawa malowanié a dłótowanié chùtkò òdstawił wnet do czësta w cemny nórt, czej szedł do robòtë w bùdowlance, a téż wzął sã za gòspòdarzenié na gbùrstwie swòjich starszich. Pò latach, czej w gbùrzenim zaczãłë pòmagac dzecë, wasta Jerzi zôs òdzwëskôł czas, żebë w gôrsc brac dłóto a pãzel. Jegò dokazë mają òsoblëwi szëk. Trzënórtné gãbë z môłima blësëznama, wëraznyma òczama. W naddôwkù mòcné nodżi, rãce... Wôrt sã przëzdrzec. Bëtowskô ekspòzycjô bãdze òtemkłô do 29 stëcznika.

Red.