Reklama

Wszëtcë òkróm nôstarszich

Kùlturowniô

11/12/2022 14:23

Trzebiatów nad Régą to je môłé miasto w Pòmòrsce, ti daleczi, dzysô ju nie kaszëbsczi. Kò piérwi, we wczasnëch strzédnëch wiekach stojało tam gardzëszcze dôwnëch Pòmòrzanów - przodków Kaszëbów. W ùszłim tidzeniu do pòdbëtowsczégò Płótowa przëjacha Renata Teréza Kòrk, direktorka Trzebiatowsczégò Òstrzódka Kùlturë. Na debatã ò pòmòrsczich miastach rôczało jã w nasze stronë Zapôdnokaszëbsczi Mùzeùm w Bëtowie (òddzél mùzeùm je w Płótowie). Białka òpòwiôda ò juwernoce mieszkańców, co przëcygnãlë do Trzebiatowa pò II wòjnie. Ze stôrëch òsta le gôrsc Niemców, chtërny z czasã wëjachalë za Òdrã abò wëmarlë. Jich plac zajãlë Pòlôszë, òsoblëwie z Wiôlgòpòlsczi a Ùkraińcë z akcje „W”. Na spòdlim negò niemieckò-pòlskò-ùkraińsczégò miszungù, do jaczégò dodalë téż spôdkòwiznã trzebiatowsczich Żëdów, miasto nad Régą dzysô bùdëje swòjã juwernotã. Bëlno, piãkno, kò na debace jeden z bëtowianów zapitôł dlôcz w ùsôdzanim pòspólny swiądë w Trzebiatowie zabëlë ò Kaszëbach. Doch ò Niemcach i Żëdach, co jich ju w miesce ni ma, pamiãtalë. Białka szczero bëła tim pëtanim zadzëwòwónô. Krótkò òdpòwiedza, że szëkającë w ùszłocë Trzebiatowa nie trafia na Kaszëbów. Mëszlã, że gôda prôwdã. Wiãkszosc terôczasnëch mieszkańców Pòmòrsczi, jidze mie ò inteligencjã, ò dôwnëch Pòmòrzanach cos jesz mô czëté, kò ju ò Kaszëbach, m.in. znónëch w tëch stronach ju z XIII w. ze sztãplów pòmòrsczich Gryfitów (stojało na nich m.in. dux Cassubie) wiédza trzimô sã le z trudna gdze. Prôwdac w Szczecënie part Kaszëbskò-Pòmòrsczégò Zrzeszeniô mô starã to zmienic, në jak to bëło czëc w Płótowie - wcyg wiele je do zrobieniô.

Red.