Reklama

Z pôłniowëch strón

Kùlturowniô

26/12/2022 18:15

„Gòstomsczé wiérztë. Refleksje z Kaszëbsczi Krôjnë” - to titel nônowszégò zbiérkù pòezje wëdôwiznë Region. Aùtorã je Wiesłôw Nowicczi (1946-2012) - aktór, teatralny reżiséra, gazétnik. Artista bez lata jezdzył do Gòstómka, gdze z białką pòstawilë latną chëcz. Rôd pòznôwôł òkòlé a jegò mieszkańców. To òni a nôtëra bëlë pòdskacenim jegò ùtwórstwa.

Wiérztë do zbiérkù pòzebra a przërëchtowa córka artistë Éwelina Nowickô. Za tłómaczenié z pòlsczégò na rodną mòwa wzã sã Felicjô Bôska-Bòrzëszkòwskô, a dëtczi na wëdôwiznã wëłożëła gmina Lëpùsz. Wëdôwizna je dëbeltjãzëkòwô.

Ùsëpë w lese

Gdze jesta, bùdownikòwie
wirtualny aùtostradë?…
pòjmańcë, mãczelnicë
òstawiony, ùmãczony.
Mô bëc darga, sztërë rédżi,
co sparłãczą wiôldżi Berlin
z Kônigsbergã, matką Prusów.
Mô bëc darga, në i kùńc.
To je pòlét, führer rzekł.
Wezta Żëdów z òkòlégò,
niech bùdëją, pò to są.
Co òstało pò ùdbie?
A, ùsëpë na ùbiedrzniach
aùtostradë, jaczich ni ma.
Gdze ti Żëdzë, co szpôdą
przëcygelë krótczé bëcé?
Gdze jich grobë, gdze jich spòczink?
Prôwdã znają stôré drzewa,
co w lëpùsczich lasach szëmarzą.