Sobótka ù Rëbôków

Kùlturowniô

27/06/2022 14:14

Za nama Sobótczi. Ta w Jastarnie je zdebło jinô. Z jinyma parłãczi jã dzéń, tj. 23.06. Prôwdac je to swiãto całi Jastarnie, to równak jegò nôwôżniészima bòhaterama są bëńlowie a dzéwczãta, co kùńczą 19 lat. To prawie negò dnia mają ùdokaznic, że rozmieją razã wespółrobic, a tak pòkazac, że ju mògą weńc w swiat dozdrzeniałëch. To taczi inicjacyjny szëk. Zaczinô sã pòchòdã ùlëcama Jastarnie. Prowadzą rozmajice przezeblekłi 19-latkòwie. Towarzą jima dzéwczãta, co sedzą na òdzémkù, jaczi cygnie kóń. Na kùńcu tegò òdzémka je beczka z tim, co sã fajno pôli. Je téż òrkestra i wiele, wiele lëdzy. Westrzód dëmù i strzélów z raketnic całé towarësztwò przechòdzy na sobótkòwi plac. Bëńlowie ùstôwiają pal z beczką a strzélającë z raketnic skacą òdżin w beczce. Ni ma skôkaniô bez òdżin, ni ma szukaniô za parpacowym kwiatã, ni ma pùszczaniô wiónków…
rs