Apka co kroczi rechùje

Nôpierwi béł lëft. Jegò szluks, ten scygniony z samégò pierwsza, baro mie sã ùwidzôł, wcyg móm starã ò pòstãpné i jak mie sã widzy, tak ju òstónie do kùńca. Pò lëftowi przëszłë do mie jiné nônãtë. Za knôpa na mléczné draże a krówczi (z tima dwùma dôwno kùńc), a tej nałożił jem sã szokòlôdë - co nigdë nie òstało wëlékòwóné a wiedno przëchòdzy nazôd. Nié do zmògniãcô. Ale taczi cygaretë nié, nigdë! Smród pôlony tobaczi w płëcach to nié mój jiwer. Zôs proceńtë a białkòwiczé jo, kò pòd kòntrolą, z latama mni a stateczno. Chcã bez to rzec, że nigdë nie béł jem òsoblëwie nałożlëwi i zawdë jem ò se mëslôł, że wastëjã nad òskòmama, nôskwarama a tim wszëtczim, co rozmieje wëpchnąc z codniowëch kòłoważi a naji hùmanizm rozjąc do czësta w trón.

Kò łoni jô so kùpił nową mòbilkã. Fajnô, z 12 megapikselowim fòto, pamiãcą wiãkszą jak ù drëchów, a jesz z rutką cwiardą jak diameńt. A jakô rozmajitosc apków! Do dzysô wszëtczich jesz jem nie sprawdzył. Pôrã jednakò jo. W tim tã do rechòwaniô kroków. Wiéta doch, bò chto bë ji nie znôł, to ta z serduszkã, czerwionym. W ji bënë nalézeta wszëtkò, òd prosti lëczbë przeszłégò do trendów, tj. że wczora mni a w ùszłim tidzeniu wiãcy më szlë abò wiadła ò stabilnoce chòdzeniô. Samò dobroctwò!

Prôwdac na zôczątkù wiele jem na niã nie wzérôł, za nią sã nie czerowôł. Dopiérkù na wczasnym zymkù, czej wioderkò na szpacérë nastało lepszé a białka z córką zaczãłë mie nëkac bùten, że to zdrowé, że sedzã doma jak zmùrchlałi dżôd, a jesz cos tam wedle tegò cwiardégò szëkù, jął jem wëchadac a pò wrócenim dodóm pòdzerac na apkã z serduszkã. Mądrził jem, wiele to kroków miôł zrobioné. Pierwi, ni ma co łgac, za wiele tegò nie bëło, tësąc, dwa… zôs dwa, tësąc… Nawet jô wiedzôł, że to zdebło mało. Tej gdzes na fejsu jô przeczëtôł, żebë chòdzëc nômni 5 tësąców (infòrmacje, że 10 tësąców tak richtich je pasowné, zdałë mie sã razną internetową manipùlacją jaczégò bota). Cëż… kùpił jem so nowé adidasë i zaczął chòdzëc nëch 5 tësąców kroków, czasã nawet 6 a rôz 7,4. Nié wiedno równak, leno dwa-trzë razy w tidzeniu. Sygło, żebë strzédnô skòczëła z 1,8 tësąca do 3-4, to je wnet dwa razë! To dobëcé òdjinaczëło mój pòzdrzatk na swiat, na sebie. Jô ùczuł sã barżi zdrowim, a nawet tak zdebło spòrtówcã. Zarô téż dokùpił jem kòszëlkã dlô joggerów a pasowną òpaskã na głowã. Mało chto mie pòznôwôł na ùlëcë, a jô sã sóm w zdrzadle le z trudna czej. Në, leno na zôczątkù. Pòtim jãlë pòkazëwac pôlcã a cziwac głowama z achtnienim. To slédné widzało mie sã nôbarżi. I prawie tej jem zmerkôł, że ze strzédną 3-4 tësące za długò nie wëbãdã jakno nôleżnik bëtowsczich szpacérnëch elit. To bez sąsôdkã, co mieszkô naprocëm. Ta dzéń w dzéń, swiãto a codnia, w słuńce a w deszcz wëchòdzy z czijkama. Òblekłô prôwdac mni szëkòwno jak jô, kò nëkô òb wieczor pò miesce nômni dwie gòdzënë. I mùszã wama rzec, że bieżi, jakbë mia mòtórk w… Pòznôł jem to, czej rôz jô za nią szedł. Chcôł jem zmerkac, co tak długò mòżna robic na swiéżim lëfce. Në, ti ji gòńbë jô za wiele nie strzimôł. Sąsôdka żdżinãła mie na widnikù a jô sôdł wnet ùmiarłi na łôwce, co jã swiéżo pòstawilë za dëtczi z òbëwatelsczégò bùdżetu. Z pierwsza mëslôł jem wòłac taxi, kò pò sztóce, czej jô zazdrzôł na apkã z serduszkã, ùdbôł jem równak na nogach wrócëc dodom. W apce stojało, że jem przeszed 4 tës. kroków. Czej jô so pòrechòwôł, wiele to dô z przeszłim nazôd, wëszło mie, że dobãdã ale rekòrd! Wej... Në, kò zarô jem pòmëslôł wiele dzysô zrobi sąsôdka? Na gwës pôrãnôsce tësączków… Tej jem so przëbôcził, że jô nigdë nie béł òsoblëwie nałożlëwi. I tak niech ju òstónie.

Apczi z serduszkã ju nie òdmikóm. Za to wszëtczim wgadëjã, żebë nie sedzelë doma, ale szlë welowac w òbëwatelsczim bùdżece. Na pòstãpné łôwczi stawióné w miescë, sã słëchô!