Reklama

Òrmùzdowé Skrë wrãczoné

Kùlturowniô

19/11/2021 22:01

Nié zëmą, jak donëchczôs, a na jeséń 19.11. wrãczoné òstóną Skrë Òrmùzdowé za 2020 r., a téż Sztipendium miona Jizabelë Trojanowsczi dlô młodëch kaszëbsczich gazétników. Nôdgrodë są przëznôwóné przez Redakcjowé Kòlegium i nôleżników redakcje „Pòmeranie” òd 1985 r. za dzejania dlô Kaszëb i całégò Pòmòrzô, òsoblëwie za pòdskacywanié jinëch do dzejaniô – to je za bëcé taką skrą, co rozmieje rozpalëc w jinszich lëdzach miłotã do rodny zemi i kùlturë – gôdô Dark Majkòwsczi, zôstãpca przédnégò redaktora miesãcznika „Pomerania”

Latos Skrë dostelë:

Adela Kùjik-Kalinowskô - profesór Pòmòrsczi Akademie w Słëpskù, lëteratùroznajôrka, pòetka;

Alicjô Gajewskô - kòcewskô dzejôrka, direchtorka Fabriczi Sztuk w Tczewie;

Artur Jabłońsczi - gazétnik, pisôrz, pòeta, twórca Radia Kaszëbë;

Hieronim Kùcharsczi - direchtór Spòlëznowi Spòdleczny Szkòłë w Czerskù, dzejôrz, historik;

Jaromira Labùdda - pòetka, szkólnô kaszëbsczégò jãzëka, aùtorka ùczbòwników do kaszëbsczégò;

Ks. Krësztof Tusk - celebrans mszów swiãtëch w rodny mòwie, inicjatór wiele wëdarzeniów sparłãczonëch z wprowadzenim kaszëbsczégò do liturgie Kòscoła;

Laùreatã sztipendium m. Jizabelë Trojanowsczi w nym rokù òstôł Matéùsz Klebba.

Red.