Reklama

Ksążka ò ksãdzu-Kaszubòlogù

Kùlturowniô

07/11/2021 14:45

Dariã Kaszubòwską kaszëbsczi lubòtnicë lëteraturë pòznelë przédno dzãka łońsczémù Òglowòpòlsczémù Lëteracczémù Kònkùrsowi m. Mieczësława Strijewsczégò. Dobëła w nim nôdgrodã Grand Prix za òpòwiôdanié „Tamten wieczór przed stu laty”. Tekst je pisóny na taczi ôrt, jaczi znajemë chòcle z dokazów Anë Łajming – narracjô jidze pò pòlskù, a dialodżi pò kaszëbskù (żelë chtos chce sã doznac wicy, rôczimë do pòsłëchaniô Lëteracczégò Ògródka na karnôlu YouTube wejrowsczégò Mùzeùm Kaszëbskò-Pòmòrsczi Pismieniznë i Mùzyczi.

Dariô równak nie kùńczi pisaniô na lëteracczich dokazach. Wëdała téż czekawą biograficzną ksążkã namienioną ks. Bògùsławòwi Szëmichòwsczémù „Wierny Bogu i Kaszubom”. Ji promòcjô bëła 5 lëstopadnika w Kaszëbsczim Fòrum Kùlturë – aùtorka gôdała m.jin. ò kaszëbsczim dzejanim herojë swòji pùblikacje, chtëren dzejôł w Kòle Kaszubòlogów w Dëchòwnym Seminarium w Pelplënie, a do swòjich parafianów kôrbił colemało pò kaszëbskù. Ksążkã wôrt przeczëtac, a Kaszubòwskô ju wnetka bãdze miała swòjã pierszëznã w całoscë pò kaszëbskù w lëteraczim pismionie „Stegna”.

Red.