Reklama

Niechże zaduje swiéżim

Kùlturowniô

14/05/2022 16:20

Òdj. A. Majkòwskô/Kaszëbsczé Fòrum Kùlturë

W ùszłim tidzeniu Kaszëbsczé Fòrum Kùlturë w Gdinie òtemkło wëstôwk kaszëbsczi knëpczi Elżbiétë Gwiazdowsczi. Ji farwné dokazë swòje mòdła bierzą z wësziwkù, szlachùją za nim, chòc nie są jegò wiérną kòpią. Knëpka je młodim szëkã kùńsztu (tzn. kaszëbskô knëpka). Wierã pierszim ji ùtwórcą bëła Blanche Krbechek, amerikónka ò kaszëbsczich kòrzeniach, etnografka. Blanche zaczãła twòrzëc swòje dokazë w 2000 r. Białka zeza Wiôldżi Wòdë téż brała z rodnégò wësziwkù, në ji pòdskacenim bëłë téż knëpczi z jinëch dzélów Pòlsczi.

Gdińsczi wëstôwk pòkazëje, że „amerikańskô” ùdba na nen nowi na Kaszëbach ôrt kùńsztu je wcyg żëwô, nie ùmiarła razã z Blanche. Je téż leżnoscą do rozmiszlaniô, co z nim dali bãdze. Weńdze òn szerzi do naszi kùlturë, stanie sã ji dzélã jak wësziwk abò malënczi na skle, a mòże naléze dlô se jiny plac, niekònieczno parłãczony z lëdowòscą? Mô wiele, co mòże pòmòc w rozkòscérzanim. Tec je dosc prostô techniczno, tónô, a dokôz dô sã stwòrzëc chùtkò. Czësto jinaczi jak wësziwk. Dlô lëdzy, co nie lëdają cwiardégò, casnégò szëkù, wëstwôrzanié farwnyma papiórama a nożëcama mòże jawic sã jak òbiecónô zemia, dzëwi òstrów, na jaczim ùtwórcë dopiérkù stôwiają pierszé kroczi, gdze ni ma jesz wëtrãpónëch stegnów, grużdżącëch wëòbrazniã mòdłów. Kò téż, prawie jak wësziwk, nen prosti kùńszt, jistno jak wësziwk, chòc „sztëczno” wprowadzony mòże stac sã kaszëbską znanką, taką na bùten a téż do bënë. Më w Kùlturownie czekómë za wiãcy.

Red.