Reklama

Kaszëbsczé pùblikacje na tôrgach

Kùlturowniô

24/11/2021 19:34

W kaszëbsczi stolëcë 19-21 lëstopadnika bawiałë Gduńsczé Tôrdżi Ksążczi. Òbczas tegò wëdarzeniô bëło wiele placu dlô kaszëbsczi lëteraturë, òsoblëwie dzãka Kaszëbskò-Pòmòrsczémù Zrzeszeniu, jaczé przërëchtowało bëlné stojiszcze ze swòjima wëdôwiznama i Mùzeùm Kaszëbskò-Pòmòrsczi Pismieniznë i Mùzyczi we Wejrowie, jaczé wespółòrganizowało pôrã òbgôdków namienionëch najémù ùtwórstwù.

Jedno z taczich zéńdzeniów tikało sã dzysdniowi kaszëbsczi lëteraturë. Przedstôwcowie MKPPiM: Tomôsz Fópka, Róman Drzéżdżón i Dark Majkòwsczi kôrbilë ò ji nôwôżniészich znankach, témach i karnie piszącëch. Òkòma nich w òbgôdce brôł ùdzél lëteraturoznajôrz Grégór Schramke.

Drëgô z diskùsjów miała titel „Co wiemy o Kaszubach? - promocja serii Vademecum kaszubskie”. Wspòmnióny je Fópka, Majkòwsczi i Schramke wespół z Adelą Kùjik-Kalinowską, Danielã Kalinowsczim, Duszanã Pażdżersczim i Łukaszã Grzãdzëcczim òpòwiôdelë pòzeszłim ò badérowaniach nad kaszëbską historią, lëteraturą, kùlturą i ò stojiznie kaszëbsczégò jãzëka.

20 lëstopadnika òdbëło sã zéńdzenié z Tomaszã Słomczińsczim, chtëren òpòwiôdôł ò swòji ksążce „Kaszëbë”. Tegò dnia bëło jesz jedno pòtkanié ò pùblikacji wôżny dlô Kaszëbów. Jidze ò „Gniazdo gryfa. Słownik kaszubskich symboli, pamięci i tradycji kultury”. Ò ti ksążce kôrbilë Cezari Òbracht-Prondzyńsczi, Witosława Frankòwskô, Justina Pòmierskô i Danuta Stanulewicz.

Red.