Reklama

Gniôzdo w internece?

Kùlturowniô

06/10/2021 13:23

Wëdóné w òstatnëch miesącach „Gniôzdo grifa” szlachùje za ksążkòwim „dwa w jednym” - to sparłãczenié bedekera i kaszëbsczi encyklopedie. Prôwdac karno aùtorów zgòdzonëch bez Kaszëbsczi Institut to badérowie z nôùkòwima titlama, tec ksążka òstała napisónô dlô zwëczajnëch lëdzy. Pewno temù je wierã nôlepi przedôwónym kaszëbòlogicznym titlã w tim rokù. Jegò sukces cygnie ùdbã, że pewno wôrt „Gniôzdo grifa” wstawic do internetu wedle ùdałégò mòdła gedanopedie. Takô cassubòpediô, jistno jak gduńsczi wzór, je mòżno pózni rozwijac, dodawac nowé hasła. W naddôwkù tónym dëtkã skaszëbic.

- I jedno, i drëdżé je mòżebné. Jiwer z tim, że to dosc tëli robòtë. Nôlégô nalezc pasownëch lëdzy i dëtka, żebë jima za wstawienié do internetu zapłacëc. Pózni pòtrzébny bãdze redachtór, co miôłbë pilowac, żebë cassubòpediô dzejała bëlnym szëkã, a téż miôł starã ò ji bògacenié nowima tekstama, òdjimkama, mapama itd. - gôdô prof. Cezari Òbracht-Prondzyńsczi prezes Institutu a nôùkòwi redachtór „Gniôzda grifa”.

Nigle cassubòpediô rëgnie w wirtualu, mòżemë kòrzëstac leno z ksążczi. Prôwdac chto mòże ten mòże, bò „Gniôzdo grifa” nie je letkò kùpic. Wëdelë më 1000 egzemplarów i wnet wszëtczé przedóne. Nie jem w sztãdze òdpòwiedzec, czë titel dô radã dodrëkòwac. Bënômni w nôblëższim czasu za tim nie wëzdrzi. Më gò zrëchtowelë za projektowé dëtczi. Bez wspiarcô ksążka mùsza bë kòsztac wiele wiãcy jak dzysô - gôdô C. Òbracht-Prondzyńsczi.