Reklama

Kònkùrs „Méster bëlnégò czëtaniô” - rôczimë méstrów czëtaniô

Kùlturowniô

04/10/2021 08:30

Ju ósmi rôz rëgnął Regionalny Kònkùrs dlô Czëtińców „Méster bëlnégò czëtaniô”. Òd czile lat òrganizëje gò Mùzeùm Kaszëbskò-Pòmòrsczi Pismieniznë i Mùzyczi we Wejrowie. Łońsczégò rokù kònkùrs béł w całoscë online, ale latos mô sã ju òdbëc „na żëwò” (żelë pandemicznô stojizna nie zmieni nëch planów).

Pòjedinczné kaszëbsczé (i nié blós) pòwiatë mają swòjich kòòrdinatorów, do jaczich wôrt czerowac pëtania ò terminë eliminacjów w gminach i krézach. Lëstã lëdzy i institucjów òdpòwiôdającëch za te etapë „Méstra Bëlnégò Czëtaniô” nalézeta w Regùlaminie, jaczi je na starnie MKPPiM. Jeżlë chtos mieszkô w pòwiece, chtëren ni mô kòòrdinatora, to mùszi sã zgłosëc prosto do wejrowsczégò Mùzeùm.

Lëstã lektur, jaczé bãdą latos czëtelë ùczãstnicë, przëszëkòwała przédniczka Radzëznë Kaszëbsczégò Jãzëka Danuta Pioch. Bãdą to:

1. dlô ùczniów kl. I-III spòdlecznëch szkòłów - wiérztë Éwë Warmòwsczi Jak tósz z kòtã, Jiwer z pùpką, Mòwa, Mój janiółk, Na dobranoc, Redosc, Taczi knôpik, Wiesołi swiat z ksążczi Dzéń za dniã (Bącka Huta 2008);

2. dlô ùczniów kl. IV-VI spòdlecznëch szkòłów - Róman Drzéżdżón, Mariolka i ji przigòdë, Gduńsk 2017, dzéle 1–3;

3. dlô ùczniów kl. VII-VIII spòdlecznëch szkòłów - Alan A. Milne, Miedzwiôdk Pùfôtk, w przekł. Bòżenë Ùgòwsczi, Gduńsk 2015, dzéle I-II;

4. dlô ùczniów wëżispòdlecznëch szkòłów - Florión Cenôwa, Rozmòwa Pòlôcha z Kaszëbą, Gdańsk 2007, s. 126-140;

5. dlô dozdrzeniałëch - Stanisłôw Janka, Psë, Gdańsk 2015.

Wiôldżi finał kònkùrsu je zaplanowóny 10 gòdnika 2021 rokù i òdbãdze sã w sedzbie wejrowsczégò mùzeùm.

Całowny Regùlamin i mòdła zgłoszeniowëch kartów nalézeta na starnie wejrowsczégò mùzeùm.

Red.