Òd katalogù dlô firm do kaszëbsczégò ebooka

Z Jarosławã [Jerkã] Éllwartã gôdómë ò Regionie. Prawie w tim rokù mijô 30 lat dzejaniô ti wëdôwiznë, chtërna òpùblikòwa wiele dokazôw pò kaszëbskù, ò Kaszëbach i Pòmòrzim.

„Pomerania”: Trzë dekadë to dobri sztëk czasu. Region pòwstôł, czej të jes kùńcził sztudia. To bëłë czekawé czasë, zmianë pòliticzné, spòlëznowé, ùsadzanié nòwégò szëkù gòspòdarczi...

Jerk Éllwart: Jo, czasë czësto czekawé, rodzył sã kapitalizm, tedë jesz dosc sëri, dzëczi... Region nie béł mòją pierszą firmą. Jesz òbczas sztudérowaniô razã z chłopã mòji kùzynczi jesmë ùsadzëlë jednã pòdjimiznã. Më robilë òdjimczi, reklamòwé materiałë. Kò to sã rozjãło. Jô chcôł jic w wëdôwiznã. Temù jem ùsadzył Region. Prôwdac, z piersza jô miôł wpisóné Pòdjimizna Ùsługòwò-Projektowô. I pò prôwdze, jakno inżiniéra pò òchronie strzodowiska i jakno technik-geòdeta, brôł jem taczé rozmajité techniczné zlecenia. Krótëchno jem téż robił w firmie Saur Neptun Gdańsk, leno pò trzech miesącach jem ju wiedzôł, że takô etatowô robòta nie je dlô mie. Tak jem jął zazerac do Kartuz, do drëkarnie spółczi Nowator, do Stacha Płotczi. Jesmë sã dogôdelë ë wzął jem sã za akwizycjã zleceniów w Trójgardze na nowé sztãple, jaczé pózni Nowator rëchtowôł w Kartuzach, a jô je rozwòzywôł pò pónktach we Gduńskù, Sopòce ë Gdinie. Jo, to bëła dobrô ë cãżkô szkòła biznesu… Midzë jinszima jô sã tedë dowiedzôł, że wedle niejednëch bismónów (pòdjimców) leno pisemny ùgôdënk sã rechùjë przë wëpłace.

Wespółrobòtë z Nowatorã jes jednakò nimò te nie cësnął...  

Nié, Stachù ùdbôł so, żebë jô sã wzął za katalog firm dlô kartësczi òbéńdë (dzysdniowégò pòwiatu). To takô ksãżka, jakô ju dôwno szła w zabët, kò tej to béł ji złoti czas. Firmë płacëłë, żebë sã w ni nalezc, pòdac adres, telefónë, co robią itd. Taczi substitut internetu ë telefóniczny ksãdżi. Do tegò jô dodôł tôfle z gòdzënama òdjazdów aùtobùsów PKS, tak żebë kòżdi chcôł miec cos taczégò doma i do tegò czãsto zazérôł. Równoczasno jem sóm zaczął rëchtowac taczi katalog téż dlô pùcczégò krézu. Jeden a drëdzi katalog sã fejn sfinansowałë, a jô wëzwëskôł leżnosc, bë dac Nowatorowi szkòłã biznesu wedle mie – że nié leno ùgôdënczi na pismie je wôrt dotrzëmëwac... 

Te katalodżi pòpchnãłë firmã na wëdôwiznową stegnã...

Jo, kò dali szukôł jem za jaczim dëtkã, temù na pół etatu jô zaczął robic w ùrbanisticznym biórze. Wcyg nie béł jô gwës, czë z wëdôwiznë sygnie na chléb. 

W 1994 r. zgòdzył jem kòle 20 akwizytorów, co chòdzëlë za zleceniama do katalogów dlô czilenôsce pòwiatów na Kaszëbach, w Bòrach a na Kòcewim. Nalôzł jem téż lëdzy, co mie to wszëtkò skłôdelë. Tej jeden z akwizytorów nalinôł, żebë më sã spòtkelë z wójtã Lëpùsza – Tadeùszã Dzemińsczim. Wójt bédowôł, żebë jô zrëchtowôł taczi turisticzny hëfcëk – Lëpùsz a òkòlé. Móm jesz pôrã... Zrëchtowôł jem to tak, jak jem rozmiôł, dzysô nikòmù sã tim nie chwôlã [smiéch]. Dopiérkù jem sã ùcził i szukaniô infòrmacjów, i redakcji, i wszëtczégò. 

Wiele wôżniészé, że czej jem sã wzął za akwizycjã reklamów do tegò hëfcëkù, téż dali òd Lëpùsza, w Sëleczënie, Kòscérznie, tam lëdze mielë na to namkłé. Gôdelë tak: A chto jezdzy do Lëpùsza? Czejbë to béł taczi prowadnik dlô całëch Kaszëb, to czësto jinô sprawa. Jem to czuł w czile placach. A akùrôt bawił rok, czedë wëdelë prowadnik pò Kaszëbsczi Szwajcarie Izabellë Trojanowsczi. Në, jem pòmëslôł, skòrno wcyg na rënkù je plac na pòstãpny, to dlôcz nie spróbòwac. Kò jô ùdbôł zrobic prowadnik na całé Kaszëbë. Pòdskacenim bëła wëdôwizna Pascala, ta pò Szwecje. W zélnikù 1994 r. jem rëgnął na Kaszëbë.

Całô kòrbiônkã z Jarosławã Éllwartã ùkôże sã w môjowi „Pòmeranie”.