Reklama

Wôżné ksążczi i czekawé òbgôdczi

Kùlturowniô

18/11/2021 16:03

W piątk, 18 lëstopadnika we gduńsczi halë AmberExpo (sz. Żaglowô 11) zaczną sã Tôrdżi Ksążczi. Òbczas ti rozegracje mdze leżnosc do òbzéraniô i kùpiwaniô kaszëbsczich ksążk, a òkróm te òrganizatorzë przërëchtowelë czile zéńdzeniów namienionëch naji lëteraturze. W piątk ò 1 pò pôłnim w halë B, zalë nr 3 bãdze pòtkanié pòd titlã: „Dzysdniowô kaszëbskô lëteratura”. Pòprowadzy je Dark Majkòwsczi, a jegò gòscama mdą pisarze i badérowie: Róman Drzéżdżón, Tomôsz Fópka i Grégór Schramke. Tegò samégò dnia (w tim samim placu) ò 4 pò pôłnim je zaplanowónô promòcjô serie Kaszëbsczé vademecum. Ò historie, jãzëkù i kaszëbsczi kùlturze bãdą kôrbic: Tomôsz Fópka, Łukôsz Grzãdzëcczi, Adela Kùjik-Kalinowskô, Daniél Kalinowsczi, Dark Majkòwsczi i Dušan-Vladislav Paždjersczi.

Wôżnym pónktã Tôrgów mdze téż pòtkanié z aùtorama ksążczi „Gniazdo gryfa. Słownik kaszubskich symboli, pamięci i tradycji kultury” (sobòta 20 lëstopadnika, hala B, zala nr 1C). Ò ti pùblikacji òpòwiedzą: Cezari Òbracht-Prondzyńsczi, Justina Pòmierskô i Danuta Stanulewicz.

Wicy ò całim wëdarzenim Tuwò.

Rôczimë!