Reklama

W Gniewinie Dzéń Jednotë Kaszëbów

Kùlturowniô

20/03/2023 17:35

Pò Zjezdze Kaszëbów to pòstãpnô leżnota do negò, żebë przede wszëtczim sã pòtkac. Nie jinaczi bëło latos na Dniu Jednotë Kaszëbów. Do Gniewina 19 strëmiannika zjachelë dozdrzeniałi, młodi a nômłodszi. DJK zaczął sã mszą sw. w kòscele pw. sw. Józefa. Pò ni 36 staniców, a za nima ùczãstnicë, przeszlë do widowiskòwò-spòrtowi halë. Tam òdbëła sã próba bicô rekòrdu w jednoczasny grze na akòrdionie. W nym rokù zagrało jich 161. Tej nie ùdało sã dobëc. Chcemë przëbaczëc, że nôwiãcy zagrało jich w Bòjanie w 2016 r. - 372.

Òkróm akòrdionów westrzód atrakcjów béł i lëteracczi ògródk. Ò biskùpie Kònstantinie Dóminikù gôdôł ks. dr Marión Miotk, ò lëdowi lëteraturze i ksążce „Figle gnieżdżewsczich gbùrów” òpòwiedzôł Rómk Drzéżdżón, a ò współczesny kaszëbsczi proze Kristina Lewna.

Red.