Reklama

Skrë, co westrzód nas żëją

Kùlturowniô

27/12/2021 14:54

Òrmùzda ze stôropersczi religie do kaszëbsczi lëteraturë sprowadzył Aleksander Majkòwsczi. I pewno nad Bôłtã bëlny bóg, chtërnégò symbòlã je òdżin, wcyg bawiłbë leno na kôrtach „Żëcô i przigòdów Remùsa”, czejbë nié redakcjô miesãcznika „Pomerania”. Gazétnicë òd 1985 r. nôdgrôdzają bëlną robòtã, nôlepi w swòji môłi spòlëznie, prawie „Òrmùzdową skrą”. Bez lata pòzebrało sã niemałé karno òrmùzdowców, kò na Kaszëbach, Kòcewim a Krajnie wcyg corôzka nowi lëdze skrzą sã dobrim, cekawim dzejanim. Chto bë chcôł zgłosëc kògò do „Skrë”, jesz mòże. Redakcjô czekô do 14 stëcznika. Nôlégô słac òpisënk kandidata na [email protected].

Red.