Reklama

Nowô gòdnikòwô „Pomerania”

Kùlturowniô

22/12/2021 20:32

Do kùpieniô ju je gòdnikòwô „Pomerania”. W ni przeczëtac mòżna m.jin. ò òbchòdach 65 lat jistnieniô Kaszëbskò-Pòmòrsczégò Zrzeszeniô, a téż wrãczeniô Òrmùzdowëch Skrów i Sztipendium m. Izabelli Trojanowsczi. Wôrt przeczëtac kôrbiónkã z Wandą Lew-Czedrowską, ùdbòdôwczką kaszëbsczégò diktanda, jaczé latos òdbëło sã ju dwadzesti rôz. Dark Majkòwsczi gôdôł téż z Karolëną Stankòwską, pierszą kaszëbską influencerką. Prof. Józef Bòrzëszkòwsczi pisze ò Chmielnie z leżnotë 8 stalatów jistnieniô.

Do negò numra dołączony je lëteracczi dodôwk „Stegna”. W nim m.jin. òpòwiôdanié „Larwka” Grégòra Schramke, jaczi dzélëk jesmë pùblikòwelë w „Kùlturownie”, a do te dokôz Jãdrzeja Chrząstka „Òbùdzył jem sã leno pò to, żebë ùmrzéc” i recenzjô nowi pòwiescë Stanisława Janczi „Mòrzkùlowie”. W „Stegnie” nié leno proza, lubòtnicë pòezje téż nalézą cos dlô se. To wszëtkò w nowi „Pòmeranie”, jakô je ju do kùpieniô.

Red.