Reklama

Rodnomòwny kòrpùs

Kùlturowniô

23/06/2022 17:56

- To je jeden z najich nôwôżniészich célów - rzekł ò rëchtowanim internetowégò kòrpùsu kaszëbsczégò jãzëka Tomôsz Fópka, direktór Mùzeùm Kaszëbskò-Pòmòrsczi Pismieniznë i Mùzyczi we Wejrowie òbczas warkòwniów miesãcznika „Pomerania”, jaczé bawiłë w przeszłi weekend w gminie Żukòwò. - To bë miało wëzdrzec tak, że sã wklepie frazã, np. „móm niszcza”, a tej wëskakiwają tekstë, gdze to bëło ùżëté, a téż całô òdmiana, np. „môsz niszcza”, „miôł jem niszcza” itd. Òkróm wpisaniô tegò wszëtczégò, pòprawieniô felów, nôcãżészé pewno bãdze dostanié zgòdów òd aùtorów tekstów - gôdôł T. Fópka.

Donëchczôs w internece prôwdac dô nalezc dosc tëli kaszëbsczich tekstów, są téż słowarze a „Biuletinë Radzëznë Kaszëbsczégò Jãzëka”, kò nie twòrzą òne jednégò systemù, chtëren pòkôzywôłbë słowa a frazë w jich rozmajitim ùżëcym, standarizowóny pisownie itd. - Kòrpùs je zjiscenim ùdbë sw.p. prof. Jerzégò Trédra – gôdô T. Fópka.

Ròbòta prawie rëgnãła. Pòpiarcé deklarëje senatór Kazmiérz Kleina a wëszëznë Gduńsczégò Ùniwersytetu. Dëtczi dôł Marszôłkòwsczi Ùrząd we Gduńskù (30 tës. zł). Pierszim krokã mô bëc internetowi słowôrz, jaczi rëchtëje Fundacja Kaszuby. To òn bãdze spòdlim, do jaczégò duńdą wëszukiwarka a baza tekstów.

Kò kòrpùs nie je zamkłim projektã. Tec w kaszëbsczim wcyg pòwstają nowé słowa, frazë, tekstë. Pòtrzébnô bãdze institucjô, jakô bãdze mia stałą starã. Mòże wejrowsczé Mùzeùm razã z Radzëzną Jëzëka a GÙ?

P.D.