Reklama

„Pòtkania z mùzyką Kaszëb” sparłãczoné z promòcją ksążczi

Kùlturowniô

07/12/2021 20:02

To pòdrechòwanié 18 lat i 66 kòncertów, jaczé òdbëłë sã w òbrëmim „Pòtkaniów z mùzyką Kaszëb” – tak ò mònografie, jakô niedôwno wëszła drëkã, gôdô Tomôsz Fópka, direchtór Mùzeùm Kaszëbskò-Pòmòrsczi Pismieniznë i Mùzyczi we Wejrowie. To prawie tam ne pòtkania cykliczno sã òdbiwają. Aùtorką dokazu je Witosława Frankòwskô. - Je téż ùdbòdôwczką całégò cyklu. Pierwi jesmë chcelë wëdac ksãżkã na 50-lecé dzejaniô mùzeùm. To sã równak nie ùdało, ale za to mómë òpisónëch 16 kòncertów wicy – gôdô Tomôsz Fópka.

W ksążce nalazłë sã wiadła ò artistach, jaczi bez lata wëstãpòwelë, ùtwórcach, jaczich mùzykã grelë, a téż dobrzińcach.

Pòdrechòwanié nôdłëgszégò cyklu kaszëbsczich kòncertów do kùpieniégò je we wejrowsczim mùzeùm, na starnie ksążnicë „Czëc”, a téż òbczas aùtorsczégò pòtkaniô 19 gòdnika ò gòdz. 16.00 w mùzeùm we Wejrowie. Sparłãczony mdze z òstatnym w nym rokù „Pòtkanim z mùzyką Kaszëb”.

Red.