Reklama

Promòcjô „Dokôzów”

Kùlturowniô

28/04/2022 18:24

Òbczas promòcje ò kaszëbsczim dzejanim Benedikta Karczewsczégò gôdôł m.jin. Eùgeniusz Prëczkòwsczi, wiceprzédnik KPZ. Na òdjimkù je z Piotrã Karczewsczim (z prawi). Òdj. A. Grenwald

Òbczas swòjégò żëcô Benedikt Karczewsczi wëdôł czilenôsce pòeticczich zbiérków i dwa heftë z kaszëbsczima rzeczónkama. Latos, dzãka m.jin. jego sënowi Piotrowi, prof. Tadeùszowi Linknerowi i dr. Krësztofòwi Jażdżewsczémù ùdało sã wëdac ne ùsôdzczi (a téż czile rëchli niepùblikòwónëch) w jedny ksążce pt. „Dokôzë zebróné”.

Promòcjô tego tomù òdbëła sã 25 łżëkwiata w Mùzeùm Kaszëbskò-Pòmòrsczi Pismieniznë i Mùzyczi we Wejrowie. Ò wiérztach Karczewsczégò rzekł m.jin. prof. Tadeùsz Linkner, lëteraturoznajôrz i aùtór wiele tekstów namienionëch pòezje tegò ùtwórcë. Gôdôł òn przédno ò kaszëbsczim patriotizmie i religijnoscë, jaczé są nôwôżniészima témama tëch ùsôdzków.

Ùczãstnicë promòcje mòglë téż pòsłëchac czile wiérztów Benedikta Karczewsczégò prezentowónëch przez Agatã Grenwald z wejrowsczégò Mùzeùm. W artisticznym dzélu wëstąpiło karno Nadolanie, chtërno zaspiéwało pôrãnôsce kaszëbsczich dokazów i pòkôzało dwa tuńce: szewca i kòwôla.

Red.