Reklama

Zrzeszony znaczi wiãcy jak wedle kòrzeniów

Kùlturowniô

08/10/2023 11:25

Pózno w jeséń łońsczégò rokù Institut Rënkòwëch a Spòlëznowëch Badérowaniów we Warszawie, Kaszëbsczi Institut i Pòmòrsczi Center Badérowaniów Kulturë Gduńsczégò Ùniwersytetu wzãlë sã za pòznanié juwernotë mieszkańców naszégò wòjewództwa (na zlecenié marszôłkòwsczégò ùrzãdu). Brzôd prawie je przedstôwióny przë rozmajitëch leżnoscach, jak chòcbë na Fòrum Animatorów Kùlturë, co bawiłë w ùszłi weekend w Tëchómiu. Tam ò badérowaniach gôdôł prof. Cezari Òbracht-Prondzyńsczi z Kaszëbsczégò Institutu.

Cekawò wëszłë deklaracje - a próba bëła wiôlgô, bò 6,6 tës. lëdzy - tikającé kaszëbstwa, kònkretno, jak mieszkańcë pòmòrsczégò wòjewództwa czëją sã sparłãczony z Kaszëbama. To że w kaszëbsczim dërżeniu (pùcczi, wejrowsczi, kartësczi a kòscersczi) òdsetk lëdzy, co czëją sã sparłãczony sygô òd 61% (kòscersczi) do 74% (kartësczi) nie je specjalno dzywné. Në kò jaż 68% taczich deklaracjów pòdelë w bëtowsczim, gdze rodzonëch Kaszëbów (wedle kòrzeniów) je dobrëch pôrãnôsce procentowëch pùnktów mni. Jesz wiãkszô różnica in plus midzë pòchòdzenim a sparłãczenim widzymë w człëchowsczim, słëpsczim abò w Trzëgardze.

Mòże to znaczëc, że kaszëbizna stôwô sã corôz barżi achtónym wybierã na pòlëcë z juwernotama, że to, gdze jem sã ùrodzył, gdze mieszkóm, je corôzka wôżniészé dlô Pòmòrzanów. Òsoblëwie tam, gdze kaszëbizna zadżinãła w XVIII-XX w. Kò nawet na Kòcewim òdsetk sygô wëżi 30%… Z drëdżi stronë nie widzymë taczi różnicë w kaszëbsczim dërżeniu. Òznôczô to, że tam ni mómë do ùczinkù z „nowòkaszëbską” juwernotą? A mòże je òna ùmniészonô kaszëbsczim kómpleksã? Badérzë jesz bãdą mielë co robic.

Red.