Reklama

Zdobë bëtowsczich Gòtów

Kùlturowniô

30/06/2022 18:01

Na Kaszëbach Gòcë z wiãksza parłãczony są z Òdrama a Wãsorama. Mni znóné są jiné place, òdkrëté pózni, nié tak czãsto òpisywóné w mediach, prowadnikach itd. Tak je z gòcczima, tj. wielbarsczima, pòòstałoscama w Bëtowie a òkòlim. Ju w XIX w. piselë ò kamianëch krãgach, jaczé miałë stojec gdzes na kraju tegò miasta, kò dzysô nie znómë gdze. Baro brzadné w nalezëszcza wielbarsczich artefaktów jawią sã òstatné lata. Pòd Rekòwã òdkrëlë pôrã wiôldżich kamianëch krãgów. Lepi zbadérowelë pòla z drëdżi stronë gardù, to je pòd Dãbiã. Archeòlodzë wzãlë sã za nie, bò miéwcowë planowelë rëgnąc tam z jinwesticjama. Temù mielë leżnosc przëzdrzec sã, co krëła zemia pòd wiôrsztą glebë jaż na pôrãnôsce hektarach. Òkróm néżków pò Gòtach, nalezlë to, co tam òstawilë lëdze kùltur łużicczi a pòmòrsczi, òksëwsczi a wczasnégò strzédnowieczô. W nen piątk, tj. 1 lëpińca, w Zôpadnokaszëbsczim Mùzeùm w Bëtowie (na zómkù) òdemkną wëstôwã z kòle 100 artefaktama zebrónyma z dãbsczich pòlów, w tim piãkną gòcką biżuterią - fibùlama a narãcznicama. Pòczątk ò gòdz. 2 pò pôłnim.

G.P.