Pòstąpny rôz na Zómkù

Dobiwcą latoségò Kònkursu Jednégò Wiérzta Liriczno na Kaszëbach miona Wacłôwa Pòmòrsczégò òsta Hanna Makùrôt-Snuzik (pòétka dobëła też łoni). Wëprzednienié dostôł Matis Klebba. Jak wiedno rozrzeszenié bëło dzélã Zómkù Pòezjë w Bëtowie, imprezë miéstnégò pòeticczégò karna Wers (28.07.). Hewò nôdgordzoné dokôzë:

Hanna Makùrôt-Snuzik

Kòl jizbë insektów

Prowincjô ksążkòwëch mólów.
Wëlãgłé wëfùlowiwają céniã
skórë żëwëch i zamòrdowónëch
ksąg Mickiewicza, Słowacczégò, Bòga.
Grëbé mëszlë tkóné miãsniama pamiãcë
jak drobnëchné żëjątka. Rozbiegają sã,
wëgrzebiwô sã z nich gnôtnik jądra.
Kòłującë w strachù i cemnoscë,
bùdują kòlumnë słowów, bë przeżérac
wnãtrznoscë strarnów. Wëòbrazni dzëczé
gatënczi rodzoné na łôwkach w céni.
Czëło jak strënë wchôdô sã w ten òbrôz.
W transcendencjã zbitą ze swiatã.
Niech sã stónie Hamlet! Niech wëbrzëmią
chùrë Faùstowsczé! Gôdô sã:
Piszã, wiãc jô jem! I z kòżdą ksãgą
historiô dërch zaczinô sã òd nowa.
Nicht nie wié, jak sã nazéwô, wierã
równak wszëtcë bëtëją. W célu absorpcji
rozpisónëch – abò – sczëtiwónëch brzątwów.
Ksążnice zakłôdô sã. Królestwa Òssolińsczich
szaf. Prowincje ksążkòwëch mòlów kòl jizbë
insektów, jizbë kwiatów i pòczëcô felënkù.
Czëtają nawetka ti, chtërny nie rozmieją czëtac.
Pòza zasygã wëdolnégò czasu.
Pòza gruńtã bëcëznë - dësze wëfùlowiwô sã
ksãgama, chtërëch ju nie dadzą radë pòłknąc.

Matis Klebba

Redota namerkónégò sobą

Pijã do szpégla
nié temù, że wkół mie
ni ma lëdzy
że jem sóm
le tak prosto
nie rozmiejã
mòjégò òdzdrzadleniô
z òczu drëdżégò człowieka
co gôdô
jemù żëcé rãką jidze
z mòdroscë stëdni
smroczno szepcącégò
òsamãtóny
dzeckò rodzoné pòd lëchim Miesądzã
to ni mògã bëc jô
dzywné są òbsądë witra
nigwësny przéńdny czas
a równak jem
szczestlëwi chòc delë mie czepk