Reklama

Midzë swiatama (dzél 2)

Kùlturowniô

28/02/2022 18:00

Jesz pôrã słów ò nowim zbiérkù òpòwiesców Risza Strucka: - Ùdba przëszła w 2018 r., kònkretno 31 rujana, czej niejedny mają Haloween. Tej jem pòmëslôł, żebë wstawic do internetu nasze pòwiôstczi ò dëszach, smiercë. Tedë lëdze zaczãlë bédowac, żebë jô pòzebrôł nowé a wëdôł ksążkã. Tak jem sã za to wzął. Gôdôł jem z mieszkańcama Jastarnie i Kùsfeldu - rzekł nama R. Struck. Pierszé promòcjowé zéńdzenié z ksãżką i ji aùtorã ju w tim tidzeniu. 3.03. ò gòdz. 17.00 mòżna przińc do kawiarnie „Weranda” w Jastarnie.

A tuwò jedna z pòwiôstków:

Nocnô slëbnô

Jeden chłop, ju dosc napiti, szedł òb noc dodóm. Na ùlëcë cëchò a pùsto. Wnym ùzdrzôł biôłą pòstacjã. Wej! To bëła młodô białka w slëbny sëknie. Normalno pewno bë sã wërzasł, doch młodô, co sama chòdzy pò cémkù ùlëcama?! Kò òn miôł so wzãté, temù sã nie bòjôł. Chwëcył białkã za rãkã, a tej ta mù rzekła: Długò jem za tobą żdała. Kùreszce jes…

Tej pòprosa ò mòdlëtwã za sebie. Òd tegò czasu chłop mùszôł dzéń w dzéń chòdzëc w noc na smãtôrz, żebë sã mòdlëc za białkã. A czej, jakno rëbôk, jezdzył kùtrã, téż ò jedny pòrze wëchòdzył na pòkłôd i téż sã mòdlił za ji dëszã.