Reklama

Mòcno bije kaszëbsczé serce

Kùlturowniô

04/11/2023 14:20

Gm. Serakòjce je jedną z nôbarżi kaszëbsczich (ùżiwanié rodny mòwë) i nôbarżi dinamicznëch, zdrzącë òd stronë gòspòdarczégò rozwiju na Kaszëbach. Je téż demògraficznym a hańdlowim centrum w strzódkù rëmù: Kartuzë – Bëtowò – Lãbórg. Prawie tam 28–29.10 trafiłë warkòwnie dlô piszącëch pò kaszëbskù, co je prowadzy redakcjô miesãcznika "Pomerania". Karno starszich gazétników i naji młodzëznë pòtkało sã z wespółmiéwcą firmë BAT Tadeùszã Bigùsã, chtëren czerëje nią ze swòjim bracyną Andrzejã, i jich dwùma pòsobnikama – Szëmònã (sënã Tadeùsza) i Tadeùszã (sënã Andrzeja).

Tej Sławòmir Bronk òpòwiedzôł ò swòji mùzyczny i kaszëbsczi drodze, zaczekawienim, jaczé westrzód pòlsczich mùzyków bùdzy naja mùzyka – ta lëdowô, jak i nowò twòrzonô. Wiele bëło téż gôdczi ò chùrze Discantus. Karno zazdrzało téż do Gminowégò Òstrzódka Kùlturë w Serakòjcach.

Bëło jesz zéńdzenié ze znóną szkólną. – Fizyk mùszi dobrze fizykã znac, chemik – chemiã, szkólny òd rechùnków – rechùnczi, a szkólny òd kaszëbsczégò: geògrafiã, lëteraturã, rodã, mùzykã, rozmajité kùńszta. Do te mùszi bëc prowadnikã, rozmiec òrganizowac wanodżi – gôda do lëdzy z warkòwniów szkólnô i direktorka szkòłë w Mòjszu Danuta Pioch.

Wiãcy w lëstopadnikòwi „Pomeranie”.

Red.