Krëjamnota, chternã widzec z daleka

Kùlturowniô

04/10/2023 19:20

Ò Rewòkòle, co sã dwigô na wiãcy jak 100 métrów nad plaskatą rówizną midzë Smôłdzënã a Gardną je ju napisóné dosc tëli. Górã je widzec z daleka, téż z mierzejë, co òddzeliwô Bôłt òd jezór Gardno, Dołdżé a Łebsczé. Do tegò Łëpawa, jakô nôkòlama òbchôdô Rewòkół òd wschòdu, żebë skrãcëc na zôpôd, a kùreszce jąc sã wlewac do gardneńsczégò jezora. Religioznajôrze rzeklëbë, że to bëlnô scenografiô do ùsadzeniô "swiãti górë". I pò prôwdze òd dôwna za taką mómë Rewòkół. Ju w strzédnëch wiekach stojała na górze kaplëca, chòwelë tam téż lëdzy i to w rozmajitëch cządach. Niżi topka górë je datowóné na VIII-IX w. grodzëszcze. Kò czë pògańsczi Pòmòrzanowie wëzwëskiwelë je i sóm topk dlô swòjich wierzeniów? Na to dokazów ni mómë. Mòże cos wiãcy sã dowiémë z badérowaniów, jaczé na kùńc lata prowadzył tu archeòlog dr Paweł Szczepanik. Badéra mô nôdzejã, że w przińdnym rokù wrócy na górã, żebë mógł lepi pòznac, co tam tak richtich wëstwôrzelë przódcë Kaszëbów.

Red.

Reklama