Reklama

Dôj mie slënã, a rzekã, kògùm të jes

Kùlturowniô

11/07/2022 10:15

Ta Kaszëbskô Sobòta w Bëtowie bëła jinô jak wiedno. Prôwdac na rënkù zôs krómë z rozmajitoscama i bina z mùzyką, tuńcã, a jesz turniér baszczi, kò niedalek na Garncarsczim placu stanął celt Pòlsczi Akademie Nôùk, kònkretno Institutu Bioòrganiczny Chemie. Karno badérów z Pòznania zbierało próbczi, żebë lepi pòznac kaszëbsczé DNA. Nôlégało wëpełnic specjalną anketã a òddac zdebełkò slënë. Wëniczi pòznómë za pôrã miesąców. To pierszé tak całowné i szeroczé badérowanié biologicznégò pòchòdzeniô Kaszëbów. Bëtowò je do te dobrim placã, to doch prôwdzëwô kaszëbskô wieża Babel, bò chto tu nie mieszkô! Pò wòjnie do dôwnëch bëtowsczich Kaszëbów, tzw. aùtochtonów, docygnãlë naszińcowie z kartësczégò, kòscersczégò, z Gôchów, i w mniészi wielënie z jinëch dzélów Kaszëb (wiãcy ò pòznôwanim naszégò DNA bãdzemë pisac w Kùlturownie pózni).

Badérowanié bëło téż dobrą leżnoscą do kaszëbieniô, kò nie jidze leno ò gôdanié rodną mòwą, ale szerszé pòkôzanié sobie a jinym, chto jô tak pò prôwdze jem, jaczé móm kòrzenie. Przëchòdzëlë stôri, strzédny, młodi, dzecë, białczi a chłopi, wësztôłcony a niewësztôłcony, bògati a razny lëdze, ti, co welëją za prawicą, za centrum a za lewicą. Në, w PAN-owsczim celce nëch różniców nie dało dozdrzec. Za to bëło zaczekawienié, smiéch, mileczné spòtkanié. Taczégò badérowaniô Kùlturowniô żëczi jinym miastóm a wsóm na Kaszëbach. Chcemë le so zbadac slënã!

P.D.