Reklama

Półtora rokù czekôł, żebë gò pòkazac

Kùlturowniô

31/10/2021 14:17

- „Zgniélc” pòkazëje dwa miesące z żëcégò terôczasny kaszëbsczi rodzëznë. To kòmediô, pò prôwdze dobrô zabawa - gôdô Riszôrd Struck, chtëren nônowszi kaszëbsczi film Béjatë Hincke òbzérôł w Jastarnie. Młodô reżisérka z Chlapòwa prawie kùńczi sztudia w szkòle filmòwi. Kò „Zgniélc” nie je ji debiutã pò kaszëbskù. W 2017 r. zrëchtowa „Manteltrégra” a zdebło pózni jész dodôwk „Manteltréger midzë letnikama”. Nowi film miôł premierã w zélnikù. Òd tegò czasu wãdrëje pò Nordze. Béł ju pòkôzóny w pôrãnôsce placach, òstatny rôz w ùszłim tidzeniu w Błãdzëkòwie. Reżisérka rôd pòjedze z nim i gdze jindze. - Chòc je pò kaszëbskù, ti co nie znają rodny mòwë, téż sã bãdą smielë. To sytuacjowi hùmòr, a w taczim przëtrôfkù dialodżi nie są jaż tak baro wôżné - klarëjë R. Struck.

W „Zgniélcu” grają amatorzë, nôwiãcy chlapòwianowie, w tim rodzëzna reżisérczi. Mùzykã napisôł ji tata Sławòmir Hincke, znóny z karna Bliza. Film bawi półtora gòdzënë, zdebło dłëgszô je wersjô na platce, jaką jidze dostac na pòkôzach. - Materiałë më nagriwelë przez 3 miesące. Pózni bëła pòstprodukcjô. Në na premierã film czekôł 1,5 rokù, bò przëszła pandemiô - dolmaczi B. Hincke.

Terô młodô chlapòwiónka mësli ò pòstãpnym filmie, jaczi z „Manteltrégrã” a „Zgniélcã”, twòrziłbë trilogiã. Mô sã nazéwac „Drëszk”. - To mô bëc kòmediô z kriminałã - gôdô B. Hincke.

Red.